Sæll dagur er nýútkomin ljóðabók eftir Björn Stefán Guðmundsson frá Reynikeldu. Bókin verður til sölu í KM þjónustunni fyrir jólin á 2000 kr.
Til hamingju með bókina Bjössi!
KM þjónustan fékk góða gesti í heimsókn um helgina en þar var á ferðinni hópur frá Sjúkrahúsinu á Akranesi auk sjúkrabílstjóra frá Borgarnesi. Það var ánægjulegt að fá hópinn í Dalina en þarna voru margir kollegar nokkurra KM karlanna en KM þjónustan hefur lengi verið viðloðandi sjúkraflutninga í Búðardal. Hópurinn heimsótti einnig fjósið á Erpsstöðum og endaði kvöldið á jólahlaðborði á Vogi. Sjá myndir í myndamöppu
Ætli sumarið hafi ekki bara loksins komið í október? Að minnsta kosti sáu nokkrir ungir og hressir krakkar ástæðu til þess að tjalda í dag og njóta útiverunnar. Staðsetningin var ekki af verri endanum en unga fólkið hreiðraði vel um sig á grasbalanum fyrir ofan fjöruna í Búðardal með flott útsýni yfir Hvammsfjörðinn.
Við höfum tekið Royal Canin hunda- og kattafóður í sölu hjá okkur í KM þjónustunni. Þessi vörulína býður upp á fjölbreytt úrval, ef þín tegund er ekki til hjá okkur getum við pantað hana fyrir þig.
KM kveðjur,
Siggi og Steina.
Vélaborg verður með Zetor dráttarvélasýningu á plani KM þjónustunnar á morgun 23. september frá kl. 16:00-20:00. Af því tilefni verður verslun KM þjónustunnar opin til kl. 20:00.
Í vikunni var tekið á því í KM þjónustunni og gólfið í bragganum steypt. Áður hafði farið töluverð vinna í að hreinsa út úr bragganum og hann sprautaður að innan, Kalli og Binni sameinuðust í því verki. Það komu margir að steypuvinnunni sjálfri en þar voru Gösli múrari, Bjarni á Leiðólfsstöðum, Gubbi í Magnússkógum, Gústi í Hjarðarholti, Kiddi Thorlacius og Binni í KM. Veðrið var ekki að auðvelda verkið því inn á milli var gríðarlegt úrhelli en menn létu það ekki trufla framgang vinnunnar og héldu gleði sinni allan tímann. Myndir frá framkvæmdum eru komnar í myndamöppu
Í sumar urðu þær breytingar hjá KM þjónustunni að Karl Ingi keypti hlut þeirra Unnsteins og Þorbjarnar í fyrirtækinu en þeir ætla báðir að einbeita sér að búskap ásamt öðrum störfum. Unnsteinn flutti sig yfir að Klúku í Strandasýslu ásamt fjölskyldu sinni þar sem hann skartar nú starfsheitinu bóndi. Þorbjörn sinnir áfram störfum í vöruflutningum hjá Vörumiðlum samhliða störfum sínum sem bóndi að Harrastöðum. Starfsmannahald breytist lítið en þó hafa tveir nýir starfsmenn tekið til starfa í verslunardeildinni en það eru Steinunn Matthíasdóttir og Sigurður Sigurbjörnsson en þau koma m.a. til með að taka við störfum Unnsteins sem hættir um næstu mánaðarmót. KM drengirnir hafa átt gott samstarf og KM Karlinn þakkar þeim bændum kærlega fyrir öll góðu samskiptin, fíflaganginn og allt það sem hefur gert vinnuna að góðum leikvelli þeirra drengja.
Í júlímöppu eru komnar myndir frá ævintýralegri sjóferð út Hvammsfjörð en báturinn endaði vélarvana og þá reyndi á hjálpsemi þeirra sem á landi voru og stóð ekki á því. Þeir Sveinn á Staðarfelli og Maggi Jóns voru meira en tilbúnir til að bregðast við og náðu að með góðu að draga bátinn í land á flotta dráttarbátnum hans Sveins. Maggi fór með bensín frá Búðardal að Staðarfelli og þaðan sigldu þeir Sveinn út þar til þeir náðu til bátsverja sem höfðu þá verið á reki í tæpa 2 klukkutíma. Vel fór um alla fyrir utan að KM frúin var farin að finna fyrir sjóveiki en talsverð undiralda var með tilheyrandi vaggi, þá var ráð að leggjast fyrir og reyna að hafa það gott. Reyndar voru áhyggjur meiri af af því hvernig hún færi að ef þessi veltingur drægist á langinn og kæmi að því að þurfa á salerni :) Sífellt varð betra í sjóinn eftir því sem nær dró landi og voru menn strax farnir að hugsa til næstu ferðar. Eftir að landi var náð var komið við á Staðarfelli þar sem Þóra tók á móti hópnum með myndarlegum málsverði og þegar allir voru orðnir endurnærðir flutti Maggi hópinn til Búðardals. Kalli, Steina og Steinar þakka kærlega fyrir sig!
Veðrið er sígilt umfjöllunarefni og ekki síst þegar það er búið að haga sér líkt og var í vikunni. Við höfum fengið fallega sólardaga, hvort sem er með vel þekktum blæstri eða logni, og svo hefur sjaldséð þoka heldur betur látið sjá sig. Það er ekki algengt að þokan nái yfir í Búðardal en þó er það búið að gerast óvenjuoft þetta árið, hún getur alveg verið sjarmerandi í hófi. Nokkrar þokumyndir hafa fengið að rata í myndaalbúm júlímánaðar ásamt myndum af fallegri kvöldbirtunni.
Myndarlegur selur hefur haldið til við Búðardal frá því í vor en hann stillir sér iðulega upp á Skarfaskeri þar sem hann kúrir og virðist mæna út Hvammsfjörðinn. Við fengum þessa mynd að láni frá Björk Gunnarsdóttur, sjá stærri mynd í myndaalbúmi júlí mánaðar.